મુંબઇ તા.૧૦
બોલિવૂડમાં માત્ર બે ફિલ્મોથી છવાઇ જનારા સાજિદ ખાન હવે પોતાની લેટેસ્ટ ફિલ્મ ‘હાઉસફૂલ’ની સિક્વલ રજૂ કરવાની તૈયારીમાં છે. અગાઉ એમની બંને ફિલ્મો હે બેબી અને હાઉસફૂલ બોક્સ ઑફિસ પર સફળ સાબિત થઇ હતી.
જો કે સાજિદ ખાન માને છે કે હિન્દી ફિલ્મો સમીક્ષકો માટે બનતી નથી. એ તો કોમન મેનને મનોરંજન આપવા માટે બને છે. સાજિદે પત્રકારોને કહ્યું, બોક્સ ઑફિસ પર હિટ સાબિત થયેલી કોઇ ફિલ્મના સમીક્ષકોએ વખાણ કર્યા નહોતા. તાજેતરમાં રજૂ થયેલી અગ્નિપથની વાત ન કરીએ. પરંતુ એ પહેલાં ચાર ફિલ્મોએ બોક્સ ઑફિસ પર ૧૦૦ કરોડનો ધંધો કર્યો. એ ચારે ફિલ્મોને સમીક્ષકોએ ઉતારી પાડી હતી.
જે ફિલ્મો બોક્સ ઑફિસ પર ઘૂમ મચાવે એ સેંકડો લોકોને રોજી રોટી પૂરી પાડે છે. તો પછી મહત્ત્વનું શું એ તમે મને કહો. સમીક્ષકો ફિલ્મ માટે ઉપકારક સાબિત નથી થતા. હિન્દી ફિલ્મો સમીક્ષકો માટે નહીં, ઓડિયન્સ માટે બને છે. હાઉસફૂલ-ટુ પણ ઓડિયન્સ માટે બની છે.
