જૂનાગઢ, ધારી, તા. ૯
ગીર જંગલ વિસ્તારના સાયનેસ રાઉન્ડમાં આજે સવારે દવ લાગ્યો હતો. ભારે પવનના લીધે જોતજોતામાં આગ ૧૦૦ હેકટર વિસ્તાર સુધીના જંગલ સુધી પ્રસરી ગઇ હતી. વનવિભાગના સ્ટાફે સાંજે માંડ આગ કાબુમાં લીધી હતી.
પાંચ કલાકે આગ માંડ કાબુમાં આવી
ગીર પશ્ચીમ અને પૂર્વ વિસ્તારની સરહદ નજીક આવેલી છોડવડી રેન્જના સાયનેસ રાઉન્ડમાં આજે સવારે અકસ્માતે જંગલમાં દવ ભભુકી ઉઠયો હતો. આગ પૂર્વ અને પશ્ચીમ વિભાગના જંગલમાં ૧૦૦ હેકટરમાં પ્રસરી ગઇ હતી. આ અંગે ગીર પશ્ચીમના ડીસીએફએ જણાવ્યું હતું કે આજે ભારે પવનના લીધે દવ જલદી પ્રસરી ગયો હતો તેને નિયંત્રણમાં લેવા માટે તેજ પવનના લીધે મુશ્કેલી સર્જાઇ હતી અને આગથી વૃક્ષ તથા ઘાસ ખાખ થઇ ગયું છે. કોઇ વન્ય પ્રાણીઓને નુકસાન થયું ન હોવાનું જણાવ્યું હતું. આગ ક્યા કારણથી લાગી એ અંગે વનવિભાગ દ્વારા તપાસ હાથ ધરવામાં આવી છે.
ધારીથી મળતા અહેવાલ પ્રમાણે ગીર પશ્ચિમના છોડવડી રેન્જમાં જામવાડા બીટ અને હડાળા રેન્જની બોર્ડર પર આજે સવારના ૧૧ વાગ્યાના અરસામાં કોઇ કારણોસર આગ ભભૂકી ઉઠી હતી. આગના બનાવને પગલે ડીએફઓ, એસીએફ સહિતના અધિકારીઓ દોડી ગયા હતા. આ આગને બુઝાવવા જામવાડા, દલખાણિયા, જસાધાર સહિતના જંગલ વિસ્તારોમાંથી વનવિભાગના મજૂરોને બોલાવાયા હતા. ભારે જહેમત બાદ સાંજે ૪ વાગ્યે આગ કાબૂમાં આવી હતી. આ આગથી ૧૦૦ હેકટરમાં ઘાસ બળીને ખાખ થઇ ગયું હતું.
|
