આ વર્ષે હાથમાં લીધેલું કામ પૂરું કર્યા પછી લગ્ન કરવાના હોવાની અફવા
મુંબઈ, તા. ૮
છેલ્લા કેટલાક મહિનાઓથી કરીના કપૂર અને સૈફ અલી ખાનના લગ્નની તારીખ બોલીવૂડનો સૌથી વધુ ચર્ચિત વિષય છે. આ બાબતે કરીના અને સૈફ મગનું નામ મરી પાડવા તૈયાર ન હોવા છતાં આ ચર્ચા ઠંડી પડવાનું નામ લેવા તૈયાર નથી. હવે આ યુગલની નજીકના ઇન્સ્ટ્રીના લોકો કહે છે કે તેમના લગ્ન કદાચ ૨૦૧૩ની સાલ ની ૧૪મી ફેબુ્રઆરી પર ધકેલવામાં આવી શકે.
''હમણાં આ બાબતે કંઈ પણ નક્કી નથી હમણાં આ બન્ને આવતે વર્ષે લગ્ન કરવાની શક્યતા પર વિચારી રહ્યા છે. 'એજન્ટ વિનોદ' ઉપરાંત આ વર્ષે આ બન્ને પાસે ઘણું કામ છે. હજુ સુધી તેઓ એકબીજા સાથે તેમજ તેમના પરિવારના સભ્યો સાથે લગ્નની તારીખ બદલ ચર્ચા કરી રહ્યા છે. ૨૦૧૩ની સાલનો 'વેલેન્ટાઈન ડે' તેમનો એક વિકલ્પ છે.'' એમ સૂત્રે કહ્યું હતું.
ફેબુ્રઆરીની ૧૦મી તારીખે આ બન્ને વેવિશાળ કરવાના હોવાની તેમજ 'એજન્ટ વિનોદ'ની રિલીઝના બીજા સપ્તાહે લગ્ન કરવાના હોવાની પણ એક અફવા છે, પરંતુ આ બાબતે સૈફ કે કરીના તરફથી કોઈ પણ પ્રકારની સત્તાવાર જાહેરાત થઈ નથી.
''આવતે વર્ષે લગ્ન કરશે તો તેઓ તેમના લગ્ન તરફ પૂરતું ધ્યાન આપી શકશે. હમણા કરીના 'એક મૈં ઔર એક તુ 'ને પ્રમોટ રી રહી છે. જ્યારે સૈફનું બધું જ ધ્યાન તેની ફિલ્મ 'એજન્ટ વિનોદ' પર છે. ટૂંક સમયમાં જ આ બન્ને લગ્નની ચોક્કસ તારીખ નક્કી કરશે.'' એમ સૂત્રે ઉમેર્યું હતું.
થોડા જ દિવસોમાં કરીના મધુર ભંડારકરની ફિલ્મ 'હિરોઈન'ના બીજી શેડયૂલનું શૂટિંગ શરૃ કરવાની છે એ પછી તે રોહિત શેટ્ટીની 'ચેન્નાઈ એક્સપ્રેસ'નું શૂટિંગ શરૃ કરશે. 'એજન્ટ વિનોદ' પછી સૈફ દીપિકા પદુકોણ સાથેની તેની હોમ પ્રોડકશનની નવી ફિલ્મ 'કોકટેલ'નું શૂટિંગ શરૃ કરવાનો છે. અબ્બાસ મસ્તાનની 'રેસ-બે' ઉપરાંત તેણે 'ગો ગોવા ગોન'નું શૂટિંગ પણ કરવાનું છે.
આ ચર્ચા પર કરીના અને સૈફે કોમેન્ટ કરવાનો અસ્વીકાર કર્યો હતો, પરંતુ સૈફ એક સપ્તાહ પૂર્વે કહ્યું હતું કે, '''એજન્ટ વિનોદ'ની રિલીઝ પૂર્વે હું મારા લગ્ન વિશેના એક પણ પ્રશ્નનો જવાબ આપવાનો નથી. હમણાં એ ફિલ્મ પર જ અમારું બધું ધ્યાન કેન્દ્રીત છે.'
તાજેતરમાં રિતેશ દેશમુખ અને જેનેલિયા ડિ'સોઝાના લગ્નના રિસેપ્શનમાં સૈફને તેના ભાવિ સસરા રણધીર કપૂર સાથે જોઈને સૈફ અને કરીનાના લગ્નની ચર્ચાએ પાછું જોર પકડયું હતું.
