ન્યૂયોર્ક તા.૨૮
જે તે દેશના કાયદાનો ભંગ ન થાય એ માટે સ્વૈચ્છિક સેન્સરશીપ લાદવાના ટ્વીટરના નિર્ણય સામે દુનિયાભરના વપરાશકારોએ ઉગ્ર વિરોધ નોંધાવ્યો હતો. અત્યાર સુધી આ સોશ્યલ નેટવર્કંિગ સાઇટસ્ જે તે દેશના ચળવળકારો અને બળવાખોરેાને તેમનો મત વ્યક્ત કરવાની તક આપતી હતી.
ટ્વીટરે વાણી સ્વાતંત્ર્ય અને વિચાર સ્વાતંત્ર્યના મુદ્દે પોતે મક્કમ હોવાનું જણાવીને પોતાની નવી નીતિ વિશે ખુલાસો કર્યો હતો પરંતુ વપરાશકારોની નારાજી દૂર થઇ નહોતી અને અસંખ્ય વપરાશકારોએ ટ્વીટરનો બહિષ્કાર કરવાની ચેતવણી સુદ્ધાં ઉચ્ચારી હતી.
સેન્ડમન્કીના ઉપનામ હેઠળ પોતાના વિચારો લખતા ઇજિપ્તના મહેમૂદ સાલેમે લખ્યું કે આ તો બહુ ખરાબ થયું.
ચીનમાં ટ્વીટર પર પ્રતિબંધ છે છતાં ટ્વીટ કરતાં આઇ વાઇવાઇ નામના વપરાશકારે સ્પષ્ટ શબ્દોમાં લખ્યું, ટ્વીટર સેન્સરશીપ રાખવાનું હોય તો હું ટ્વીટ કરવાનું બંધ કરી દઇશ.
મોટા ભાગના વપરાશકારોએ એવો આગ્રહ સેવ્યો હતો કે સેન્સરશીપનો પોતાનો નિર્ણય ટ્વીટરે પડતો મૂકવો જોઇએ.
