પોન્ટીંગે સોબર્સ અને રિચાર્ડસની બરોબરી કરી
એડીલેડ,તા.૨૪
ભારત સામેની શ્રેણીની ચોથી અને આખરી ટેસ્ટમાં ઓસ્ટ્રેલિયાના સિનિયર બેેટ્સમેન પોન્ટીંગે ૪૧મી સદી ફટકારતાં નોટઆઉટ ૧૩૭ રન કર્યા હતા અને વિક્રમોની વણઝાર સર્જી હતી. પોન્ટીંગે આ ઇનિંગ દરમિયાન ટેસ્ટ ક્રિકેટમાં ૧૩,૦૦૦ રન પુરા કર્યા હતા. પોન્ટીંગે તેની કારકિર્દીની ૧૬૨મી ટેસ્ટની ૨૭૫મી ઇનિંગમાં આ સિધ્ધિ મેળવી હતી. દ્રવિડે ૧૩ હજાર રન ૧૬૦મી ટેસ્ટ રમતાં નોંધાવ્યા હતા. જ્યારે તેંડુલકર ૨૬૬મી ઇનિંગમાં જ આ સિધ્ધિ મેળવી હતી.
પોન્ટીંગે ભારત સામે ટેસ્ટમાં સૌથી વધુ રન ફટકારવાનો વિન્ડિઝના ભૂતપૂર્વ કેપ્ટન લોઇડનો રેકોર્ડ તોડયો હતો. ઓસ્ટ્રેલિયાના સિનિયર બેટ્સમેને ભારત સામે ૮મી સદી ફટકારી હતી અને ભારત સામે ટેસ્ટમાં સૌથી વધુ સદી ફટકારવામાં વિન્ડિઝના લેજન્ડરી બેટ્સમેનો વિવ રિચાર્ડસ અને સર ગેરી સોબર્સની બરોબરી કરી હતી.પોન્ટીંગે ૨૦૦૬ની એશિઝ બાદ પ્રથમ વખત એક જ શ્રેણીમાં બે સદી ફટકારી ેહતી. તેણે એડીલેડના મેદાન પર છઠ્ઠી સદી નોંધાવી હતી અને એક મેદાન પર ૧૫૦૦ રન પુરા કરવાની સિધ્ધિ પણ મેળવી હતી. માત્ર સાત જ બેટ્સમેનો એક જ મેદાન પર ૧૫૦૦થી વધુ રન નોંધાવી શક્યા છે.
પોન્ટીંગ-ક્લાર્ક વચ્ચેની નોટઆઉટ ૨૫૧ રનની ભાગીદારીની સાથે આ શ્રેણીમાં ઓસ્ટ્રેલિયા તરફથી ચોથી વખત ૨૦૦થી વધુની ભાગીદારી નોંધાઇ હતી.
