દિલ્હી પોલીસ ડબલ ગેમ રમવામાં થાપ ખાઇ ગઇ
મુંબઇ, તા.૨૩
દેશની બે ટોચની ઇન્વેસ્ટીગેશન એજન્સી ઇન્ટેલિજન્સ બ્યુરો અને મહારાષ્ટ્રની એન્ટી ટેરરીઝમ સ્કવૉડ વચ્ચે સમન્વયના અભાવને લીધે મુંબઇમાં ૧૩/૭ના સિરિયલ બ્લાસ્ટનો ખતરનાક આતંકવાદી યાસીન ભટકલ અને તેના બે સાગરીતો પોલીસને હાથતાળી આપી છટકી ગયા. ઇન્ડિયન મુજાહીદ્દિનનો ભટકલ તેના સાગરીતો સાથે ભાયખલામાં એટીએસના મુખ્યાલયની નજીકમાં જ ભાડેથી ઘર લઇને રહ્યો હતો.
ઇન્ટેલિજન્સ બ્યુરોએ ભટકલને પકડવા માટેના આ આખા ઓપરેશનમાં એટીએસને અંધારામાં રાખી હોવાનું ચિત્ર ઉપસે છે. જમણા હાથને ખબર નહોતી કે ડાબો હાથ શું કરે છે એવી હાલત થઇ. મુંબઇ પોલીસના ખાસ યુનિટે દિલ્હી પોલીસને મદદ કરી હતી. પણ ૧૩/૭ના કેસની તપાસ ચલાવતી એટીએસને ખબર જ નહોતી કે શું ચાલી રહ્યું છે.
આધારભૂત સૂત્રોના જણાવ્યા મુજબ દિલ્હી પોલીસ નવેમ્બરના ત્રીજા સપ્તાહથી યાસીન ભટકલનું પગેરું દબાવતી ફરતી હતી. દિલ્હી પોલીસ ઇન્ટેલિજન્સ બ્યુરોને માહિતી આપી હતી. પણ એન્ટી-ટેરરિઝમ સ્કવૉડને અંધારામાં જ રાખી હતી.
પોલીસના સૂત્રોએ કહ્યું હતું કે દિલ્હી પોલીસ ડબલ ગેમ રમી હતી. દિલ્હી પોલીસ ડિસેમ્બર મહિનાની મધ્યથી મુંબઇમાં તંબૂ તાણીને બેઠી હોવા છતાં એટીએસને તો સાતમી જાન્યુઆરીએ જ આ ઓપરેશનની જાણ કરી હતી. જ્યારે એટીએસને ખબર પડી કે દિલ્હી પોલીસ આ કેસ ઉકેલવાની તૈયારીમાં છે ત્યારે દિલ્હી પોલીસ જશ ખાટી ન જાય માટે ઉતાવળિયું પગલું લઇને મોહંમદ નકીની મુંબઇમાં ધરપકડ કરી હતી. હકીકતમાં નકીને દિલહી પોલીસ જ પ્લેનમાં મુંબઇ લઇ આવી હતી અને તે ભટકલને પકડવા માટેના ઓપરેશનમાં મદદ કરતો હતો. નકી જ ઇન્ડિયન મુજાહિદ્દીનના આતંકવાદીને ઓળખી બતાવવાનો હતો. નકીને પકડીને બે દિવસ કસ્ટડીમાં રખાતા ભાયખલાના હબીબ બિલ્ડિંગમાં ભાડે રહેતા ભટકલ અને તેનાં સાગરીતો સતર્ક થઇ ગયા હોવાનું અને નાસી છૂટયાનું મનાય છે.