| રાજકોટ, સોમવાર
સિંગતેલના ભાવ રોકેટ ગતિએ વધતા છેલ્લાં છ દિવસમાં ડબ્બે રૃા. ૧૦૦નો ભારેખમ ઉછાળો રહ્યો છે. રાજકોટ સિંગતેલમાં આજે ડબ્બે વધુ રૃા. ૨૦ વધી નવા ટીનના રૃા. ૧૭૭૫થી ૧૭૮૦ના ભાવ બોલાઇ ગયા હતાં. છુટક ૧ કિલોના ભાવ રૃા. ૧૧૮ની ટોચની સપાટીએ પહોંચી ગયા છે.
એક કિલો છુટક સિંગતેલના રૃા. ૧૧૮ બોલાયાઃ મગફળી મળતી ન હોવાનો તેલ મિલરોનો લૂલો બચાવઃ મગફળીના ભાવ સ્થિર
સિંગતેલમાં બેકાબુ તેજી ફુંકાવા છતાં સરકાર દ્વારા અસરકારક પગલાં ન લેવાતા સિંગતેલના ભાવ દિન-પ્રતિદિન નવી ઉંચી સપાટી બનાવી રહ્યા છે. સિંગતેલની તેજી પાછળ મિલરો મગફળી મળતી ન હોવાનો લુલો બચાવ કરી રહ્યા છે. મગફળીની અછત હોય તો ખેડૂતોને મગફળીના ઉંચા ભાવ મળવા જોઇએ. છેલ્લા એક અઠવાડિયામાં તેલમાં ડબ્બે રૃા. ૧૦૦ વધ્યા પરંતુ મગફળીના ભાવ ખાંડીએ રૃા. ૨૦૦ પણ વધ્યા નથી.
મિલ પહોંચ મગફળીના ભાવ રૃા. ૧૬૩૦૦થી ૧૮૫૦૦ના ભાવે સ્થિર રહ્યા છે તેવી રીતે સીંગદાણામાં પણ ખાસ લેવાલી ન હોવાથી ટન દીઠ રૃા. ૫૯૫૦૦થી ૬૩૦૦૦ના ભાવે અથડાઇ ગયા છે.
સિંગતેલ અને સાઇડ તેલોના ભાવ વચ્ચે તફાવત વધુ રહેતાં સિંગતેલમાં મોટા પાયે મિલાવટ થઇ રહી છે. શાપર- વેરાવળ, જૂનાગઢ, ખંભાળિયા, ગોંડલ, ધોરાજી વગેરે સેન્ટરોમાં ટીનીંગવાળા સિંગતેલના નામે ભેળસેળીયુ તેલ પધરાવી રહ્યા છે.
સૌરાષ્ટ્રમાં ઉનાળુ મગફળીનું ધીમી ગતિ વાવેતર શરૃ થઇ ગયું છે પરંતુ નવી ઉનાળુ મગફળી બજારમાં આવતા હજુ ત્રણ મહિના જેવો સમય લાગશે. આ ત્રણ મહિનામાં બ્રાન્ડવાળાઓ નફાખોરી કરી તેલના ભાવ કયાં પહોંચાડશે તે કહેવું મુશ્કેલ છે. સૌરાષ્ટ્રના અમુક બ્રાન્ડવાળાઓએ સિંગતેલ લુઝ ૧૦ કિલોમાં રૃા. ૧૧૦૦ના ભાવે પણ સોદા કર્યા હોવાનું ચર્ચાઇ રહ્યું છે ત્યારે પુરવઠા તંત્રે હવે હાથજોડી બેસી રહેવાના બદલે સટ્ટાખોરી કરતી તેલ મિલો પર ધોંસ બોલાવવી જોઇએ તેવી તીવ્ર લોકમાંગ ઉઠી છે. |
