| ધોરડોમાં શુટીંગ બાદ બીગ-બીએ કચ્છી ભોજન આરોગ્યું
ભુજ,રવિવાર
'શિયાળે સોરઠ ભલો, ઉનાળે ભલો ગુજરાત, વરસે તો વાગડ ભલો અને પાંજો કચ્છડો બારે માસ' જેવા કચ્છી ગીતોના તાલે આજે ધોરડો ખાતેના સફેદરણમાં મહાનાયક અમિતાભ બચ્ચને 'કચ્છ નહિ દેખા તો કુછ નહી દેખા-૨'નું શુટીંગ કર્યું હતું. સવારે પથી ૬ ડીગ્રી ઠંડીમાં કચ્છી ટ્રેડિશનલ કપડા પહેરીને બીગ-બીએ પ્રવાસીઓને કચ્છ આવવા આમંત્રણ આપ્યું હતું.
વહેલી સવારે બીગ-બી કાફલા સાથે જુનાગઢ જવા રવાનાઃ બ્લોગ પર કચ્છી મહેમાન ગતિના ભરપૂર વખાણ કર્યા
ધોરડો ખાતે સફેદરણમાં ટેન્ટસિટી ખાતે સવારે ૬ વાગ્યે કડકડતી ઠંડીમાં બીગ-બી તેમના કાફલા સાથે શુટીંગ કરવા પહોંચી ગયા હતા. કચ્છી કલાકારોએ કચ્છી ગીતો ગાઈને બીગ-બીને મંત્રમુગ્ધ કર્યા હતા. રાવણહથ્થો, મોરચંગ, ઘડાવાદક, જોડિયાપાવાના તાલ સાથે સુર્યોદય અને સુર્યાસ્તના સમયનું શુટીંગ થયું હતું. કલાકારોએ કચ્છી ગીતો અને ઈન્સ્ટુમેન્ટ પર બીગ-બીએ ઠુમકા લગાવી પ્રવાસીઓને કચ્છ રણોત્સવમાં આવવા માટે આમંત્રણ આપ્યું હતું. રાત્રીના સમયે કચ્છી ભોજન પીરસાયું હતું. જેમાં બાજરાનો રોટલો, લસણની ચટણી, રીંગણાનો ઓળો, મીક્ષ દાળ, કઠોડ સહિતની વાનગીઓ પીરસવામાં આવી હતી. રાત્રીના કાર્ગો ફાર્મ હાઉસ ખાતે પહોંચી બીગ-બીએ આરામ કર્યો હતો. ત્યાંથી સવારે ૬ વાગ્યે બાય રોડ જુનાગઢ ખાતે રવાના થયા હતા. ત્યાં ર૪ના શુટીંગ કરશે તેવું પ્રવાસન વિભાગના સુત્રોમાંથી જાણવા મળ્યું છે. |
