* ગાઝીયાબાદમાંથી ૫ જાન્યુઆરીએ ૯૦ લાખ રૂપિયા મળ્યા..
* ફૈઝાબાદમાંથી ૮૧.૮૪ લાખની રોકડ મળી આવી.
* મેરઠમાંથી ૪૦ લાખ રૂા. પકડાયા.
*૬જાન્યુઆરીએ બારાબંકીમાંથી ૧.૩ કરોડ રૂપિયા જપ્ત કરાયા...
* ૭ જાન્યુઆરીએ લખનૌ ખાતે એક કારમાંથી ૨૨ લાખ રૂપિયા ઝડપાયા.
* ૧૧ જાન્યુઆરીએ લખનૌમાંથી દોઢ કરોડ રૂપિયા પકડાયા...
ઉપરોક્ત યાદી લાંબી બની રહી છે. ચૂંટણીઓ આવતાં જ રોકડ રૂપિયાની હેરાફેરી વધી છે. આ હેરાફેરી શેના માટે થઈ રહી છે તે પણ પ્રજા જાણે છે. ચૂંટણી જંગમાં થનારા બે નંબરના ખર્ચામાં આ પૈસો વપરાવાનો હતો.
સત્તાવાળાઓ આ બે-નંબરી પૈસાની સિસ્ટમને પકડી રહ્યા છે. આવો પૈસો ક્યાંથી આવ્યો, ક્યાં વપરાશે અને કોના માટે વપરાશે તે અંગેની તપાસ દરેક કેસમાં થાય છે. આ પૈસો કોની માલિકીનો હોય છે તે ભાગ્યે જ પકડાય છે.
આમ, પાંચ રાજ્યોની ચૂંટણીઓમાં પૈસો પાણીની જેમ વેરાશે એ પ્રકારની તમામ સંભાવનાઓ સાચી પડી છે. ક્યાંક સત્તાવાળાઓની અતિશયોક્તિ હશે પરંતુ ભારતની પ્રજા હવે એટલું જાણી ગઈ છે કે ચૂંટણીમાં વિવિધ રીતે પૈસો વેરાય છે. જેમાં મત ખરીદવાથી માંડીને કાર્યકરોને નાસ્તો કરાવવા સુધીના મુદ્દાઓનો સમાવેશ થાય છે.
જેની પાસે મત ખરીદવાની શક્તિ છે અથવા તો મતદારોને વિવિધ પ્રલોભનો આપવાની શક્તિ છે એવા લોકો જ જંગમાં ઝુકાવી શકે છે તે પણ નિશ્ચિત બની ગયું છે. વિધાનસભાના ઉમેદવારોને ૧૬ લાખ રૂપિયા ખર્ચવાની સંમતિ આપવામાં આવે છે. તેમણે રોજ સાંજે હિસાબ પણ આપવાનો હોય છે. પરંતુ ચૂંટણીમાં ખર્ચ એડજેસ્ટ કરવાની ચાલ દરેક પક્ષો રમતા હોય છે.
પાંચ રાજ્યોની વિધાનસભાની ચૂંટણીઓમાં બ્લેકમનીની બોલબોલા રહેવાની છે. કેમકે આચાર સંહિતા હેઠળ મર્યાદિત ખર્ચ કરવાનો છે. ખર્ચ ઉપરાંતનો પૈસો બે-નંબરનો વપરાવાનો છે. રવિવારની કોલમ ટોકંિગ પોઇંટમાં જણાવાયું હતું પાંચ રાજ્યોની કુલ ૬૯૦ બેઠકો માટે રૂા. ૬,૯૦૦ કરોડ રૂપિયા હશે. કેમકે લગભગ દરેક રાજ્યમાં ઉમેદવારો કરતાંય વઘુ તેના પૈસાની બોલબોલા છે. જે વઘુ પૈસા ઉઠાવે તે સક્ષમ ઉમેદવાર છે એવી લાગણી મતદારોમાં પ્રસરેલી છે.
એક અંદાજ અનુસાર અત્યાર સુધીમાં માત્ર ઉત્તર પ્રદેશમાંથી જ ૨૮ કરોડ રૂપિયા હેરાફેરી દરમ્યાન પકડાયા છે. હજુ ચૂંટણીઓ આડે ઘણીવાર છે. ત્યાં સુધીમાં આવી રોકડ પકડાવાની ઘટના મોટા પાયે બહાર આવશે. કેમકે અહીં મત ખરીદવા પૈસા વેરવામાં આવે છે.
યુપીએ સરકારની પ્રથમ ટર્મમાં ડાબેરી પક્ષોએ ટેકો પાછો ખેંચ્યો ત્યારે બહુમતી સાબિત કરવા થયેલા મતદાનમાં સાંસદ ખરીદી કૌભાંડ બહાર આવ્યું હતું. સંસદની કલંકિત ઘટના ત્યારે બની હતી કે જ્યારે નોટોના થોકડા સંસદમાં બતાવ્યા હતા. આ નોટોના થોકડાથી સંસદ સભ્યને ખરીદવાની જાળ બીછાવાઈ હતી. જે દેશમાં સંસદ ખરીદાઈ શકે તો પછી મતદારો ખરીદવા તો તેમના માટે આસાન હોય છે.
અશિક્ષિત વિસ્તારોમાં ધર્મના નામે, જ્ઞાતિના જોરે અને પૈસાની લાલચ બતાવીને મત ખરીદવાની ઘટના બને છે. આ સ્થિતિ લાંબા સમયથી ચાલી આવે છે. ચૂંટણી આચાર સંહિતાના કારણે જાહેરમાં રોકડની વહેંચણી નથી થતી પરંતુ પડદાપાછળ આવા સોદા રૂટીન બની ગયા છે.
તાજેતરમાં પંજાબમાં ઉમેદવારો ઉમેદવારી પત્રક જોઈ રહ્યા છે. એક ઉમેદવાર જ્યારે ફોર્મ ભરવા ગયા ત્યારે તેમના સમર્થકોએ ચલણી નોટોનો વરસાદ વરસાવ્યો હતો. અહીં ઉછળેલી ચલણી નોટો સામે જોકે હજુ કોઈ તપાસ શરૂ થઈ નથી.
ચૂંટણીઓ જ્યારે જ્યારે આવે છે ત્યારે ત્યારે બ્લેકમનીની હેરાફેરીમાં વધારો થાય છે. આ વખતે ચૂંટણી પંચ સક્રિય બનતાં આવા કિસ્સાઓ પ્રકાશમાં આવી રહ્યા છે. ઘણીવાર ઉતાવળમાં રમૂજ પણ થાય છે. બેંકના એટીએમમાં રોકડા પૈસા ભરવા જતી વાનને પણ પૈસાની હેરાફેરીમાં સંડોવાઈ છે કરીને જપ્ત કરવામાં આવી હતી. તે અંગેના સમાચારોને પણ ટીવી સમાચાર માઘ્યમોમાં ચમક્યા હતા. જોકે પાછળથી તે અંગે ખુલાસો પણ કરાયો હતો. ઉત્તર પ્રદેશના રાજકારણમાં તો આવા પૈસાનો વહિવટ ચૂંટણી જાહેર થાતં પહેલાં જ થઈ ગયો હતો. તેમ છતાં બાકીના ડીલીંગો પડદા પાછળ થતા ચાલુ રખાયા હતાં.
આટલી જંગી રકમ ચૂંટણીઓ દરમ્યાન પકડાય તે સૂચવે છે કે મતદારોને ખરીદવા રાજકીય પક્ષો સક્રિય છે.