'અ' પરથી સારું નામ જાણો છો? તો અભિષેક બચ્ચનને મોકલો
ઐશ્વર્યા-બાળકીના નકલી ફોટાથી અમિતાભ-અભિષેક નારાજ
મુંબઈ, તા. ૨૦
બોલિવૂડના કલાકાર દંપતી અભિષેક અને ઐશ્વર્યાની પુત્રી આજ-કાલ ફિલ્મ જગતમાં ચર્ચાનો મુખ્ય મુદ્દો બની છે. અભિષેકે તેની બાળકીના 'અ' ઉપરથી શરૃ થતા નામો સૂચવવાની તાજેતરમાં જ ટ્વિટર પર ચાહકોને વિનંતી કરી હતી.
બીજી બાજુ દાદા અમિતાભે આ નાનકડા મહેમાનનો કોઈપણ ફોટો આપવાનું નકારી કાઢતાં જણાવ્યું હતું કે આ તેમની અંગત બાબત છે.
દરમિયાન ઇન્ટરનેટ પર ચર્ચાઈ રહેલી એશ અને તેની પુત્રીની તસવીર અંગે પણ બચ્ચન પરિવારે નારાજગી વ્યક્ત કરી હતી.
અમિતાભ બચ્ચને ટ્વિટર પર જણાવ્યું હતું કે ''ઘણા લોકો બેબી બચ્ચનનો ફોટો માગી રહ્યાં છે. તમે સમજી શકો છો કે આ ઘણી અંગત બાબત છે અને તેવું કરવું શક્ય નથી.'' આ અગાઉ બચ્ચન બેટી બી ની યાદગાર ક્ષણોને કેમેરામાં કંડારવાના અનુભવ અંગે પણ જણાવ્યું હતું.
બીજી બાજુ ઈન્ટરનેટ પર 'વહેતો' થયેલો ઐશ્વર્યાની પુત્રીનો ફોટો બનાવટી હોવાનું કહી અમિતાભ અને અભિષેકે આ ઘટના અત્રે નારાજગી વ્યક્ત કરી હતી. તેમણે કહ્યું હતું કે આ ફોટો કોઈ કુશળતાવાળી વ્યક્તિએ બનાવ્યો છે પણ તે સાચો નથી. બિગ બીએ ટ્વિટર પર લખ્યું હતું કે ઐશ્વર્યા અને બાળકીની હોસ્પિટલમાં હોય તેવી અનેક તસવીરો ઇન્ટરનેટ પર મુકવામાં આવી છે, પણ આ તમામ તસવીરો બનાવટી છે.
અભિષેક બચ્ચને પણ લખ્યું હતું કે ઐશ્વર્યાના હાથમાં પુત્રીવાળો ફોટો બનાવટની રચનાત્મકતા સરાહનીય છે પણ આ તસવીર બનાવટી છે. ઉલ્લેખનીય છે કે બેબી બી અને ઐશ્વર્યાની આ 'બનાવટી' તસવીર આજકાલ ઈન્ટરનેટ પર ધુમ મચાવી રહી છે.