જોકે સંજય પાસે નૃત્ય કરાવવું કે નહીં એ બાબતે મૂંઝવણ
મુંબઇ,
કરણ જોહરની ફિલ્મ 'અગ્નિપથ'ની રિમેકમાં ગબ્બરનો આધુનિક અવતાર ભજવતા સંજય દત્તને તેની સમકાલીન હેલન તરીકે કેટરિના કૈફનો સાથ મળશે. જાણવા મળ્યા મુજબ આ ફિલ્મમાં આ બંને 'ચિકની ચમેલી' આઇટમ નંબર કરવાના છે અને આ આઇટમ ગીતની પ્રેરણા 'શોલે'ના ગીત 'મહેબૂબા મહેબૂબા' પરથી લેવામાં આવી છે.
કરણ જોહર, ફિલ્મનો દિગ્દર્શક કરણ મહેરા અને કોરિયોગ્રાફર ગણેશ આચાર્ય પડદા પર પ્રથમ વાર સંજય અને કેટરિનાની જોડી પાસે નૃત્ય કરાવવા બદલ ઉત્સાહિત છે, પરંતુ આ ગીતમાં સંજયના ભાગ બદલ તેઓ મૂંઝવણમાં છે.
સૂત્રે જણાવ્યા પ્રમાણે, ''મહેબૂબા' ગીતમાં ગબ્બરે ઊભા થઈને હેલન સાથે ડાન્સ કર્યો નહોતો આથી સંજય કેટરિના સાથે નૃત્યમાં જોડાય કે પછી એક જ જગ્યાએ બેસીને કેટરિનાનું નૃત્યુ જુએ, એ બાબતે નિર્માતા, દિગ્દર્શક અને કોરિયોગ્રાફર મૂંઝવણ અનુભવી રહ્યા છે.''
આ આઇટમ ગીત માટે કેટરિનાએ શૂટિંગ પહેલાં બે સપ્તાહ રિહર્સલ કરવા માટે આપ્યા છે. ''આ ગીતના સ્ટેપ્સ, મુવમેન્ટ અને હાવભાવ બનાવટી લાગે નહીં તેમ જ નૃત્ય બોલ્ડ હોય પણ બીભત્સ લાગે નહીં તેવી કેટરિનાની ઇચ્છા છે. ગણેશે તેને ખાતરી આપી છે કે તે શીલાથી, સાવ વિરુદ્ધ લાગશે, પરંતુ બીભત્સ નહીં લાગે' એમ સૂત્રે ઉમેર્યું હતું.
