વર્ષમાં થોડા દિવસ માટે જ વરસાદી માહોલમાં ફોટોગ્રાફીની તક મળે. હવામાન ખરાબ હોય ત્યારે ક્રીએટિવ ફોટોગ્રાફરને તો મજા પડી જાય. ચોમાસામાં કેમેરાને થર્મોકોલના બોક્ષમાં મૂકી ફૂગ ના લાગે તે જોવું જોઈએ. પરંતુ સાથે મસ્તીભર્યા લીલા-પીળા-ગ્રે રંગો ક્લીક કરવા જોઈએ.
મોન્સુનમાં રંગબેરંગી છત્રીઓ, બાળકોના રેઈનકોટ, છત્રીમાં કપલ, આકાશમાં વાદળો અને વીજળી તેમજ દરિયાકિનારે તોફાની મોજાં અને ભીંજાતા લોકો તમને ફોટોગ્રાફીની ઉત્તમ તકો આપે છે. થોડી ટિપ્સ નોંધી લ્યો.
પ્લાસ્ટિક બેગમાં કેમેરાને ઢાંકી અથવા છત્રીનું આવરણ લઈ ફોટોગ્રાફી કરતા રહો.
રીક્ષા કે કારમાં સંતાઈને પણ ફોટોગ્રાફી કરી શકાય. સામાન્ય કરતાં એક સ્ટોપ ઓછું રાીખવાથી દ્રશ્ય જરા ઘેરૂ બનશે અને રિઝલ્ટમાં તોફાની અસર પણ મળી જશે.
નેશનલ જીઓગ્રાફિક ફોટોગ્રાફર્સ ફિલ્ડગાઈડના સૂચન પ્રમાણે ઘેરા બ્રેકગ્રાઉન્ડ સામે વરસતા વરસાદનો ફોટો સરળતાથી લઈ શકાય. શટરસ્પીડ ઓછામાં ઓછી ૧/૧૨૫ રાખવી. વરસાદને લાંબી લીટીમાં ઝડપવો હોય તો ઓછી સ્પીડ વાપરવી.
ફ્લેશ પર પાણી પડે તો શોક લાગશે એટલે છત્રીનો ઉપયોગ કરવો. બેગમાં સિલિકા જેલ રાખવી. ભેજ સામે લડવા માટે તે શ્રેષ્ઠ હથિયાર છે. ગેડગેટ બેગ, સ્લાઈડ બોક્ષ, નેગેટિવ અને પ્રિન્ટમાં સિલિકાને સીલ કરી રાખો. ઓવનમાં સૂકવી ફરી વાપરો. સિનિઅર ફોટોગ્રાફરના વરસાદી ફોટા જુઓ, મેગેઝીન વાંચો, ચર્ચા કરો અને સલામતી સાથે મોન્સુન ફોટોગ્રાફી માણો.
