મુંબઇ - મહાનગર મુંબઇમાં 'મીટર જામ' ઝુંબેશને હજુ મહિનો પણ થયો નથી ત્યાં હવે ફરીથી તે ઝુંબેશ મોટા પાયા પર આદરવાની તૈયારી થઇ રહી છે. વધુમાં આ વખતે મુંબઇ ઉપરાંત અન્ય ત્રણ શહેરના પ્રવાસીઓ પણ તેમાં જોડાવાના છે.
મુંબઇમાં 'મીટર જામ' ઝુંબેશના પ્રણેતા તથા એડવર્ટાઇઝિંગ ક્ષેત્ર સાથે સંકળાયેલા રચના બ્રાર, જયદેવ રૃપાની તથા અભિલાષ કૃષ્ણન હવે મોટા પાયા પર અને સુયોગ્યતાપૂર્વક ફરીથી તે ઝુંબેશ આદરવાના છે. પ્રથમ ઝુંબેશના બેમહિના બાદ ભારતના ચાર શહેરમાં ફરીથી તે ઝુંબેશ આદરવામાં આવશે. જે મુજબ ૧૨મી ઓક્ટોબરે મુંબઇ, દિલ્હી, ચેન્નાઇ તથા બેંગલોરમાં 'મીટર જામ' કરવામાં આવશે.
ઓગસ્ટ મહિનાની ઝુંબેશ પછી અન્ય શહેરમાં પણ તેવા પ્રકારની ઝુંબેશ શરૃ કરવાની અનેક વિનંતીઓ કરવામાં આવી રહી છે એમ ૨૮ વર્ષનો જયદેવ રૃપાની કહે છે. હજુ પણ અનેક રિક્ષા-ટેક્સી ચાલકો દ્વારા પ્રવાસીને ગંતવ્ય સ્થાને લઇ જવા માટે નનૈયો ભણવામાં આવે છે તથા મીટર સાથે ચેડાં કરવામાં આવે છે અને ગેરવર્તણૂક પણ આચરવામાં આવતી હોવાનું રૃપાની ઉમેરે છે.
નિર્ધારિત ઝુંબેશના દ્રિતીય તબક્કાને હવે એક મહિના જેટલો જ સમય બાકી રહ્યો છે. જેને અનુલક્ષીને જાહેરાત ક્ષેત્ર સાથે સંકળાયેલા ત્રણેય વ્યવસાયિકો ફેસબુક અને તેમની વેબસાઇટનો ઉપયોગ કરે છે. જેના દ્વારા તેઓ દિલ્હી, બેંગલોર અને ચેન્નાઇમાં સ્વયંસેવકોની નિમણૂક કરવાની શરૃઆત કરી છે. સ્વયંસેવકોને ફોર્મ ભરવાનંું હોય છે. અત્યાર સુધીમાં૧૫૦ સ્વયંસેવકોની નોંધણી થઇ હોવાનું જણાવીને કૃષ્ણન ઉમેરે છે કે તે પૈકી અમુકની પસંદગી કરવામાં આવ્યા પછી ટેલિફોન પર તેમનો ઇન્ટરવ્યુ લઇને ઝુંબેશનો મોરચો સંભાળવા માટે શહેર દીઠ ત્રણ વ્યક્તિની નિમણૂક કરીશું.
અનેક લોકો દ્વારા આ વખતે ઝુંબેશને એક દિવસની જગ્યાએ બે-ત્રણ દિવસ સુધી ચાલુ રાખવાની વિનંતી કરી હોવાનું કૃષ્ણન જણાવીને કહ્યું હતું કે તે બાબતમાં તેઓ હજુ અનિર્ણિત છે. આ ઉપરાંત ૧૨ ઓક્ટોબર સુધીમાં તેઓ ફરિયાદ પ્રક્રિયા શરૃ કરવાના હોવાનું રચના બ્રાર જણાવે છે. જેને અંતર્ગત વ્યક્તિઓ એસએમએસ કે વેબસાઇટ મારફતે અપરાધી ડ્રાઇવરનું નામ નોંધાવી શકે છે.
જેને પરિણામે વારંવાર ગુનો કરનારાની ડેટાબેંક બનાવવી સુલભ સાબિત થશે. બીજે છેડે ભાડું નકારતાં ન હોય તથા ખૂબ નમ્રતાપૂર્વક વાતચીત કરતા હોય તેવા ડ્રાઇવરનના નામ અને નંબર નોંધાવવાની પણ લોકોને વિનંતી કરી રહ્યા ંછે. જેને કારણે અનેક લોકો સેવાનો લાભ લેવા ફોન પર તેમનો સંપર્ક સાધીને તેમને કમાણી કરવાની તક પ્રદાન કરી શકે છે.
|
