(પીટીઆઇ) લંડન, તા.૯
બેન્કિંગ અગ્રણી ગોલ્ડમેન સાસ પર બ્રિટનમાં ૨ કરોડ પાઉન્ડનો દંડ ફટકારવામાં આવે એવી શક્યતા છે. અમેરિકામાં ૧ અબજ ડૉલરની છેતરપીંડીના આક્ષેપો બાદ પાંચ મહિનાથી ચાલી રહેલી તપાસના અંતે યુએસ સિક્યુરીટીઝ એન્ડ એક્સચેન્જ કમિશન (એસઇસી)એ બેન્ક પર પેનલ્ટી લાગુ કર્યા બાદ બ્રિટનની નાણાકીય નિયમન સંસ્થા એફએસએ (ફાયનાન્સીયલ સર્વિસ ઑથોરિટી) દ્વારા પણ બેન્કને દંડ ફટકારશે એવી શક્યતા છે. એસઇસીએ એબાકસ નામની મોર્ગેજ આધારીત સિક્યુરીટીની સ્કીમમાં ગોલ્ડમેન પર રોકાણકારોને ગેરમાર્ગે દોરવાનો આક્ષેપ કર્યો હતો.
અગ્રણી ઇન્વેસ્ટમેન્ટ બેન્કની સ્કિમને કારણે રોકાણકારોને અબજ ડૉલરનું નુકસાન થયું હતું
બ્રિટિશ અખબારના અહેવાલ પ્રમાણે એફએસએ એકથી બે દિવસમાં જ ગોલ્ડમેન સાસને ૨ કરોડ પાઉન્ડ સુધીનો દંડ ફટકારવાની જાહેરાત કરશે એવી શક્યતા છે. ૫૫ કરોડ ડૉલરના કેસમાં એસઇસી સાથે સમધાન કરવાના બેન્કના પ્રયાસોને એફએસએનો નિર્ણય મોટા ફટકા સમાન પુરવાર થશે.
અમેરિકી માર્કેટ રેગ્યુલેટરે 'એબાકસ'નામની સંકુલ મોર્ગેજ આધારીત સિક્યુરીટીમાં ગોલ્ડમેન પર રોકાણકારોને છેતરવાનો આક્ષેપ કર્યો હતો એ પછી એફએસએએ પણ ઇન્વેસ્ટમેન્ટ બેન્ક સામે તપાસ શરૃ કરી હતી. એસઇસીનો દાવો હતો કે જે સિક્યુરીટીના આધારે બેન્કે બેટીંગ કર્યું હતું એ હેજ ફંડની વિગતો રજૂ કરવામાં ગોલ્ડમેન નિષ્ફળ નિવડી હતી. જેને કારણે રોકાણકારોને અંદાજે ૧ અબજ ડૉલરનો ફટકો પડયો હતો.
બ્રિટિશ રેગ્યુલેટર એફએસએ દ્વારા અત્યાર સુધી સૌથી વધુ દંડ જેપી મોર્ગન પર લાદવામાં આવ્યો છે, ગ્રાહકોના નાણાં અલગ ખાતામાં નહિ રાખવા બદલ જેપી મોર્ગન પર ૩.૩૩ કરોડ પાઉન્ડનો દંડ ફટકારવામાં આવ્યો હતો. એસઇસીના આક્ષેપોને કારણે ગોલ્ડમેનની છબિને મોટો ફટકો પડયો છે. એબાકસના કેસમાં ગોલ્ડમેને ભૂલ થઇ હોવાનું જણાવ્યું હતું જો કે એઇસીના આક્ષેપો બેન્કે નકાર્યા હતા.
