સુરત,
સુરત જિલ્લામાં છેલ્લા પાંચ દિવસથી મેઘરાજા રોટેશન મુજબ વરસી રહ્યા છે. આજે દિવસના ૪ કલાકમાં કામરેજ તાલુકામાં સાંબેલાધાર વરસાદ વરસતાં ૪.૫ ઇંચ અને ઓલપાડમાં ૩.૫ ઇંચ વરસાદથી જળબંબાકાર થઇ ગયો હતો. આ બે સિવાયના તાલુકામાં મેઘરાજાની ગતિ ધીમી રહી હતી. દરમિયાન સુરત શહેર-જિલ્લામાં છેલ્લા ૩૨ કલાકમાં કુલ ૩૯ ઇંચ વરસાદ ઝીંકાયો છે.
પૂર નિયંત્રણ કક્ષના પ્રવકતાના જણાવ્યા મુજબ ગઇકાલ મંગળવારે વિતેલા ૨૪ કલાકમાં મેઘરાજાએ ધમધમાટી બોલાવતાં પલસાણા તાલુકામાં ૬.૫ ઇંચ વરસાદ વરસ્યો હતો. જો કે આ ૬.૫ ઇંચ વરસાદમાં દિવસના ૮ કલાકમાં જ ૪ ઇંચ વરસાદ નોંધાયો હતો. બાકીનો ૨.૫ ઇંચ વરસાદ રાત્રે વરસ્યો હતો. જ્યારે વિતેલા ૨૪ કલાકમાં બારડોલીમાં દિવસના ૨ ઇંચ અને રાત્રે ૨.૫ ઇંચ મળી કુલ ૪.૫ ઇંચ વરસાદ ઝીંકાયો હતો. આ સિવાયના તાલુકામાં પણ અડધા ઇંચથી ત્રણ ઇંચ સુધીનો વરસાદ ૨૪ કલાકમાં વરસ્યો છે.
મંગળવારે મેઘરાજાએ ધુંઆધાર બેટીંગ કર્યા બાદ આજે સવારે ૪ કલાકમાં ગતિ ધીમી પડી હતી. ત્યારબાદ સુરત જિલ્લાના કામરેજ તાલુકામાં બપોરના ૧૨ વાગ્યાથી ૪ વાગ્યા સુધીના ૪ કલાકમાં ૪.૫ ઇંચ વરસાદ ઝીંકાતાં કામરેજ ચાર રસ્તાના શોપીંગ સેન્ટરોમાં પાણી ભરાયા હતા. તો કામરેજ રોડ ઉપર ભૈરવ કોલોનીમાં બોર્ડ પાસે ઘુંટણસમા પાણી વહેતાં વાહન વ્યવહાર અને લોકોની અવરજવર બંધ થઇ ગઇ હતી. કામરેજ બજારમાં પણ પાણી ફરી વળ્યા હતા. બપોરે ૪ વાગ્યા પછી વરસાદ થોડો ધીમો પડતાં વરસાદી પાણી ઓસરી જતાં જનજીવન પૂર્વવત થઇ ગયું હતું. આમ શનિવારે ઓલપાડ, સોમવારે માંડવી, મંગળવારે પલસાણા અને આજે કામરેજમાં ૪ ઇંચ વરસાદ ખાબક્યો હતો.
કામરેજ તાલુકાને બાદ કરતાં ઓલપાડ તાલુકામાં બપોરે ૨ વાગ્યા પછી મેઘરાજા આક્રમક બન્યા હતા. જેમાં ૪ વાગ્યાથી લઇને ૬ વાગ્યા સુધીના ૨ કલાકમાં ૨.૫ ઇંચ વરસાદ વરસતાં જનજીવન ખોરવાયું હતું. ઓલપાડ તાલુકામાં બપોરે ૨ થી ૬ વાગ્યા સુધીના ૪ કલાકમાં ૩.૫ ઇંચ વરસાદ નોંધાયો છે. આ બન્ને તાલુકાને બાદ કરતાં અન્ય તાલુકામાં સવારે ૮ વાગ્યાથી બપોરના ૪ વાગ્યા સુધીમાં ૮ કલાકમાં બારડોલીમાં ૧.૫ ઇંચ, પલસાણામાં ૧ ઇંચ, માંડવી, મહુવા, માંગરોળમાં ૦.૫ ઇંચ વરસાદ નોંધાયો છે. હવામાન વિભાગ દ્વારા આગામી ૪૮ કલાકમાં ધોધમાર વરસાદ વરસવાની આગાહી કરવામાં આવતાં તંત્ર એલર્ટ થઇ ગયું છે.