મોરબી -
મોરબીમાં આજે સવારથી વાદળ છાયા વાતાવરણ વચ્ચે ઝરમર વરસાદ પડવો શરૃ થયો છે. અને માંડ સુકાયેલ રોડ - રસ્તા ફરી ભીના થતાં ગારો કિચડથી વાહન ચાલકો પરેશાન થયા છે.
છેલ્લા ત્રણેક દિવસથી વરસાદે વિરામ લીધો હતો ત્યાં આજે સવારથી મોરબીનાં આકાશમાં છવાયેલ વાદળોએ ધીમી ધારે વરસવું શરૃ કર્યું હતું. હજુ માંડ રોડ રસ્તા તેમજ ખેતરો પગ મુકવા લાયક બન્યા હતાં ત્યાં ફરી વરસાદી માહોલથી ગારા કીચડનું સામ્રાજય સ્થપાયું હતું. રાહદારીઓ માટે રોડ ઉપર ચાલવું પણ મુશ્કેલીરૃપ બન્યું હતું તો વરાપથી નિંદવાનું કામ થઈ શકશે તેવી આશા બંધાવી ફરી વરસાદી માહોલ બંધાતા ખેડુતો ચિંતામાં મુકાયા છે. ચાલુ વર્ષે વરસાદની બદલાયેલી પેટર્નને ખેડુતો આશ્ચર્યજનક ગણાવી રહ્યા છે. અને લીલા દુષ્કાળની સ્થિતિ સર્જાવાની ભીતી વ્યકત કરી રહ્યાં છે. તો વરસાદી માહોલ વચ્ચે મચ્છુ-૨ ડેમમાંથી પણ ત્રણ દરવાજા બે ફૂટ ખુલ્લા રાખી ૩૮૮૭ કયુસેક પાણીનો નિકાલ મચ્છુનદીમાં કરવામાં આવી રહ્યો છે.
|
