ગોધરા
કચ્છ જિલ્લામાંથી મોટર સાયકલો ચોરી કરીને પંચમહાલ જિલ્લામાં લાવી નંબર પ્લેટ બદલી તેને વેચવાનું કૌભાંડ પોલીસે ઝડપી પાડી સીંગેડી ગામના એક યુવાનને ઝડપી પાડયો હતો. તેણે વેચેલી ૧૪ મોટર સાયકલો સહિત ૧૫ કબજે કરવામાં આવી છે જ્યારે અંજારના બે વાહનચોરોને ઝડપી પાડવાના ચક્રો ગતિમાન કરાયા છે.
પંચમહાલ જિલ્લા સ્પેશ્યલ પેરોલ સ્કવોડના પોસઇ એમ.આર. સોલંકી અને સ્ટાફના માણસોને સીંગેડી ગામનો રમેશ મગન બારીયા નામનો ઇસમ ચોરીની મોટર સાયકલ સાથે ગોધરા તરફ આવી રહ્યો હોવાની બાતમી મળી હતી. જેથી ગોધરા વાવડીબુર્ઝગ ખાતે મુનલાઇટ સીનેમા નજીક વોચ ગોઠવી હતી. વર્ણન આધારિત બાઇક સાથે પસાર થતા ઇસમને અટકાવી પોલીસે પુછપરછ કરતા રમેશે ગલ્લા તલ્લા કર્યા હતા. પોલીસે મોટર સાયકલના કાગળોની માંગણી કરી કડકાઇ પુર્વક પુછપરછ હાથ ધરતા તે ભાંગી પડયો હતો. અને પોતે ચોરીની બાઇકની નંબર પ્લેટ બનાવવા આવ્યો હોવા સહિત મોટર સાયકલ કચ્છ જિલ્લાના અંજાર ખાતે રહેતા દેવનાથ રામનાથ બાવા અને સલીમ ફકીર મહંમદ શેખે ચોરી કરી વેચવા આપી હોવાનું જણાવ્યુ હતું. જેથી પોલીસે ૩૫ હજારની કિંમતની મોટર સાયકલ સાથે અટકાયત કરી હતી. ગોધરા શહેર પોલીસ મથકે મુદ્દામાલ સુપ્રત કરી પોલીસે વધુ પુછપરછ કરતા તેણે અન્ય ૧૪ મોટર સાયકલો ઘોઘંબા તાલુકાના ગ્રામ્ય વિસ્તારોમાં અલગ અળગ વ્યક્તિઓને વેચાણ કરી હોવાની કબુલાત કરી હતી. જેના આધારે પોલીસે તેને સાથે રાખી વેચાણ કરેલા ઇસમો પાસેથી અંદાજીત અઢી લાખ રૃપિયાની ૧૪ મોટર સાયકલો કબ્જે લીધી હતી. પોલીસે ઝડપાયેલા રમેશ બારીયા સામે કાર્યવાહી હાથ ધરી અંજારના બે ઇસમોની ધરપકડના ચક્રો ગતિમાન કર્યા છે.