અમદાવાદ,
સોહરાબ કેસમાં નરેન્દ્ર કે.અમીનની તાજના સાક્ષી બનવા અંગેની અરજી સંદર્ભમાં કલમ-૩૦૬ની બંધારણીય કાયદેસરતા નિર્ણિત કરવા અંગેના રેફરન્સ કેસની સુનાવણીમાં અમીનનું કન્ફેન્શનલ સ્ટેટમેન્ટ રેકોર્ડ કરવાની સીબીઆઇની માંગણી ગુજરાત હાઇકોર્ટે આજે હાલના તબક્કે ગ્રાહ્ય રાખી ન હતી. જસ્ટિસ જયંત પટેલે જણાવ્યુ હતુ કે, રેફરન્સ નિર્ણિત કરવાના તબક્કે આ બાબત ધ્યાને લેવાશે. જો કે, સીબીઆઇએ એન.કે.અમીનની જાનને સાબરમતી જેલમાં ગંભીર જોખમ હોવાથી તેને વડોદરા જેલમાં ખસેડવાની માંગણી કરાતા જસ્ટિસ જયંત પટેલે એન.કે.અમીનને કડક પોલીસ બંદોબસ્ત સાથે આજે રાત્રે ૯-૦૦ વાગ્યા સુધીમાં વડોદરા સેન્ટ્રલ જેલમાં ખસેડી દેવા જેલ સત્તાવાળાઓને ફરમાન કર્યુ હતુ.
હાઇકોર્ટે ઠરાવ્યુ હતુ કે, અદાલતના હુકમની રાહ જોયા વિના ખુદ રાજયની જેલોના આઇ.જીને આ હુકમનું તાત્કાલિક ધોરણે પાલન કરવાનું જણાવવા હાઇકોર્ટે સરકારી વકીલને તાકીદની સૂચના પણ આપી હતી. ઉપરાંત વડોદરા સેન્ટ્રલ જેલમાં અમીનની સુરક્ષા અને સલામતી માટેના જરુરી તમામ પગલા જેલોના આઇજી અને જેલ સુપ્રિટેન્ડન્ટે ભરવાના રહેશે. હાઇકોર્ટે રેફરન્સ કેસની વધુ સુનાવણી તા.૧૪મીએ મુકરર કરી હતી.
સીબીઆઇ તરફથી વરિષ્ઠ ધારાશાસ્ત્રી કે.ટી.એસ.તુલસી અને સ્પેશ્યલ કાઉન્સેલ યોગેશ એન.રવાણીએ રજૂઆત કરતા જણાવ્યુ હતુ કે, અમીનની તાજના સાક્ષી બનવા સંદર્ભે સીઆરપીસી કલમ-૩૦૬ની બંધારણીય કાયદેસરતા નક્કી કરવા બાબતે જે રેફરન્સ હાઇકોર્ટ સમક્ષ આવ્યો છે તેની પર આખરી નિર્ણય લેવાય ત્યાં સુધી અમીનનું કન્ફેન્શનલ સ્ટેટમેન્ટ સીબીઆઇ કોર્ટ સમક્ષ લેવાય તે માટે કોર્ટે હુકમ કરવો જોઇએ. કારણ કે, અમીનની જાનને જેલમાં ગંભીર ખતરો છે. ખુદ અમીનની પત્નીએ સીબીઆઇ સમક્ષ ફરિયાદ કરી છે કે, જેલમાં બીજા આરોપીને અમીનને મારી નાંખવા રુ.૧૦ લાખની સોપારી અપાઇ છે અને તેણે ના પાડતા તે આરોપીને અન્ય આરોપીઓએ હાથમાં ઇજા પહોંચાડી છે. આ સંજોગોમાં જો અમીનને કંઇક થઇ જાય તો નિવેદન લેવાયેલુ હોય તો નક્કર પુરાવો તો કોર્ટ પાસે ઉપલબ્ધ રહે. આ હકીકત ધ્યાનમાં રાખીને ન્યાયના હિતમાં અમીનનું નિવેદન લવાનો હુકમ કરવો જોઇએ.
સીબીઆઇ તરફથી અમીનને તાત્કાલિક ધોરણે સાબરમતી જેલમાંથી અન્ય જેલમાં ખસેડવાની માંગણી કરાતા જસ્ટિસ જયંત પટેલે સીબીઆઇને જ જણાવ્યુ કે, તમે કહો, તે જેલમાં અમીનને ખસેડવાનો હુકમ કરવામાં આવશે. સીબીઆઇએ વડોદરા જેલની માંગણી કરતા હાઇકોર્ટે આજે રાત્રે ૯-૦૦ વાગ્યા સુધીમાં અમીનને વડોદરા જેલમાં ખસેડી દેવા આદેશ કર્યો હતો.