મુંબઈ, તા. ૯
ડીબીઅર્સ જૂથનાં રફ હીરાનાં ઉત્પાદનમાં ૨૦૦૯ના પૂર્વાર્ધમાં નોંધાયેલી ભારે પીછેહઠ પછી, ૨૦૧૦ના પ્રથમાર્ધમાં નોંધપાત્ર ઉછાળો આવ્યો છે.
આ અંગે પ્રાપ્ત સત્તાવાર આંકડા દર્શાવે છે કે ૨૦૦૯ના પૂર્વાર્ધમાં ડીબીઅર્સનું ઉત્પાદન ઘટીને ૬૫,૯૧,૦૦૦ કેરેટની સપાટીએ આવી ગયું હતું, જે હાલમાં ૨૦૧૦ના પૂર્વાર્ધમાં ઉંચકાઈને ૧૫૪,૩૨,૦૦૦ કેરેટની સપાટીએ પહોંચ્યું છે.
ડીબીઅર્સ ખાસ કરીને જે ચાર દેશોમાં અત્યારે રફ હીરાનું ઉત્પાદન કરે છે તે છે બોટ્સવાના, નામીબીઆ, દક્ષિણ આફ્રિકા અને કેનેડા.
આ વર્ષના પૂર્વાર્ધમાં આ દેશોમાં ડીબીઅર્સનું ઉત્પાદન વધીને આ પ્રમાણે થયું છે. (કૌંસમાં આપેલા આંકડા આગલાં વર્ષનાં પૂર્વાર્ધની સ્થિતિ દર્શાવે છે) સઘળા આંકડા કેરેટમાં છે. બોટ્સવાના ૧૦૨,૬૭,૦૦૦ (૩૯,૧૬,૦૦૦) નામીબીઆ ૭,૯૪,૦૦૦ (૩,૮૫,૦૦૦), દક્ષિણ આફ્રિકા ૩૫,૮૯૦૦૦ (૧૬,૬૫,૦૦૦).
અમે એ યાદ કરવું ઉપયોગી થઈ પડશે કે ૨૦૦૮ના છેલ્લા ત્રિમાસિક હપ્તાથી માંડીને ૨૦૦૯ના શરૃઆતના મહિનાઓ દરમિયાન હીરા ઉદ્યોગ ભારે મંદીમાં સપડાયો હતો. રફ હીરાના ભાવમાં ભારે ગાબડાં પડયાં હતાં. પરંતુ જાણે કોઈ હીરા ખરીદવા ઇચ્છતું હોય નહિ તેવી પરિસ્થિતિ ઉદ્દભવી હતી. એટલે ડીબીઅર્સ દ્વારા તેની કેટલીક ખાણો અમુક સમય, લગભગ બંધ કરી દીધી હતા. અથવા તેનું ઉત્પાદન સારી પેઠે ઘટાડી નાખ્યું હતું. હાલમાં પરિસ્થિતિ બદલાઈ છે. ફરીથી રફ હીરાની માગ વધી રહી છે. એટલે ઉત્પાદન વધારવામાં આવી રહ્યું છે.
