અમદાવાદ, ગુરૃવાર
ખાદ્ય ફુગાવામાં જોરદાર ઊછાળો નોંધાયો હોવાના પ્રતિકૂળ અહેવાલો સામે એફઆઈઆઈના રોકાણમાં થયેલા નોંધપાત્ર વધારા સહિતના અન્ય સાનુકૂળ અહેવાલો પાછળ મુંબઈ શેરબજાર ખાતે આજે સતત ચોથા દિવસે પણ જારી રહેલ નવી લેવાલી પાછળ બેંક શેરો તેમજ પસંદગીના હેવીવેઈટ શેરોની આગેવાનીઓ અન્ય શેરોમાં પણ સુધારો નોંધાયો હતો. જેના પગલે કામકાજના અંતે બીએસઈ સેન્સેક્સમાં ૧૩૨.૯૫ પોઈન્ટનો ઊછાળો નોંધાતા તે ૧૮૭૯૯.૬૬ની ૩૧ માસની ઊંચી સપાટીએ બંધ રહ્યો હતો. ૨૮ ઓગસ્ટે પૂરા થતા સપ્તાહ માટે ખાદ્ય ફુગાવાના દરમાં આજે ૧૧.૪૭ ટકાનો જોરદાર ઊછાળો નોંધાવા પામ્યો હતો. આ પ્રતિકૂળ અહેવાલોની સામે એફઆઈઆઈના રોકાણના પ્રોત્સાહક આંકડાની જાહેરાત થઈ હતી. જૂન માસથી અત્યાર સુધીમાં એફઆઈઆઈ દ્વારા રૃા. ૪૦૦૦૦ કરોડનું રોકાણ કરવામાં આવ્યું છે. જ્યારે ૨૦૧૦ના કેલેન્ડર વર્ષમાં એફઆઈઆઈનું રોકાણ રૃા. ૬૦૦૦૦ કરોડની સપાટીએ પહોંચી જવા પામ્યું છે. આ અહેવાલોની આજે બજારના માનસ પર સાનુકૂળ અસર થઈ હતી. આ ઉપરાંત અર્થતંત્રની વૃદ્ધિ તેમજ પ્રોત્સાહક ચોમાસા સહિત કોર્પોરેટ ક્ષેત્રના કેટલાંક અહેવાલોની પણ બજાર પર સાનુકૂળ અસર જોવા મળી હતી. આ અહેવાલો પાઈપ આજે દેશી-વિદેશી સંસ્થાઓ સહિત ચોમેરથી નીકળેલ નવી લેવાલી પાછળ આજે બેંક શેરો તેમજ પસંદગીના હેવીવેઈટ શેરો પાછળ અન્ય શેરોમાં ઝડપી સુધારો નોંધાયો હતો. નવી ઝડપી લેવાલી પાછળ આજે બેંક ક્ષેત્રમાં ૨૭૭.૯૮ પોઈન્ટનો જંગી ઊછાળો નોંધાયો હતો. આજે સ્ટેટ બેંકમાં ૩ ટકા એચડીએફસી બેંકમાં ૨.૬૭ ટકા અને આઈસીઆઈસીઆઈ બેંકમાં ૧.૪૮ ટકા સહિત અન્ય બેંક શેરોમાં તેજી તરફી વલણ રહ્યું હતું. પસંદગીના હેવીવેઈટ શેરોની આગેવાન મહિન્દ્રા-મહિન્દ્રાએ લીધી હતી. આ શેરમાં આજે ૩.૧૬ ટકાનો ઊછાળો નોંધાયો હતો. આ સિવાય આજે હિરો હોન્ડા, મારૃતિ, ટાટા મોટર્સ, એન્ટીપીસી, ભેલ, લાર્સન, સિમેન્સ, ટાટા સ્ટીલ, સેઈલ, હિંદાલકો, ઇન્ફોસીસ, એચસીએલ ટેકનો, આઇડિયા સેમ્યુલર, હિંદ યુનીલિવર સહિત અન્ય શેરો મક્કમ રહ્યા હતા. આજે કન્ઝયુમર ગુડ્ઝ, પીએસયુ અને મેટલ ઇન્ડેક્સ તેમજ આ ક્ષેત્રના શેરો પણ મક્કમ રહ્યા હતાં.
નિફટી, સ્ટેટ બેંક અને ટાટા સ્ટીલના ફયુચર ડિસ્કાઉન્ટમાં ઃ નિફટી ઇન્ડેક્સ ૩૨ પોઈન્ટ વધ્યો
એનએસઈનો નિફટી આંક આગલા બંધ ૫૬૦૭.૮૫ની સામે ૫૬૦૮.૩૦ની સપાટીએ ખુલી બે તરફી કામકાજના અંતે ૩૨.૨૦ પોઈન્ટ વધીને ૫૬૪૦.૦૫ની સપાટીએ મજબૂત રહ્યો હતો. નિફટી સપ્ટેમ્બર ફયુચર આજે ૯.૫૦ પોઇન્ટ ડિસ્કાઉન્ટ થઈને ૫૬૩૦.૫૫ની સપાટીએ રહ્યો હતો. આજે સ્ટેટ બેંકનો ફયુચર ૨૯૫૮ અને ટાટા સ્ટીલનો ફયુચર ૫૯૧.૫૦ની સપાટીએ ડિસ્કાઉન્ટમાં હતો. જ્યારે ટાટા મોટર્સનો ફયુચર્સ ૧૦૨૦.૯૦ની સપાટીએ પ્રિમીયમમાં હતો.
ગુજરાત પિપાવાવ પોર્ટનું ૨૨ ટકા પ્રિમીયમે લિસ્ટીંગ થયું ઃ ૧૭ ટકા પ્રિમીયમથી બંધ રહ્યો
તાજેતરમાં આઇપીઓ સાથે મૂડી બજારમાં આવેલ ગુજરાત પિપાવાવ પોર્ટનું આજે આકર્ષક લિસ્ટીંગ થવા પામ્યું હતું. આજે આ શેરનું ૨૨.૨૮ ટકા પ્રિમીયમથી રૃા. ૫૬.૨૫ના ભાવે લિસ્ટીંગ થયું હતું. કંપનીએ આ શેર રૃા. ૪૬ના ભાવે આપ્યા હતા. આ શેર આજે વધીને રૃા. ૫૪.૪૦, ઘટીને રૃા. ૫૧.૯૦ થઈ છેલ્લે રૃા. ૫૪.૦૫ની સપાટીએ બંધ રહ્યો હતો. જે ૧૭.૫ ટકા પ્રિમિયમ દર્શાવે છે. આજે આ શેરમાં ૫.૭૯ કરોડ શેરના હાથ બદલા થયા હતાં.
મીડકેપ-સ્મોલકેપ સેગમેન્ટમાં કેટલાંક શેરોમાં નોંધપાત્ર પીછેહઠ
આજે મીડકેપ શેરોમાં એમવીએલમાં ૧૯.૩૧ ટકા, શ્રી ગ્લોબલમાં ૨૦ ટકા તેમજ ઇન્દ્રપ્રસ્થ ગેસ, ગેમન ઇન્ફ્રા. અને રેડીકો ખૈતાનમાં ૪.૬ ટકા સુધીનો ઘટાડો નોંધાયો હતો. જ્યારે સ્મોલકેપ શેરોમાં શ્રૃષ્ટિ ઇન્ફ્રા., ઈન્ડો રામા સીથેં, કોઠારી પ્રોડક્ટસ, ઇઆઇએચ એસો. હોટલ અને આંધ્ર સિમેન્ટમાં ૫.૪ ટકા સુધીનો ઘટાડો નોંધાયો હતો. જોકે આજે મીડકેપ ઇન્ડેક્સમાં ૫૪.૩૧ અને સ્મોલકેપ ઇન્ડેક્સમાં ૩૩.૨૦ પોઈન્ટનો સુધારો નોંધાયો હતો.
ઈદ-ઊલ-ફિત્રને અનુલક્ષી આજે શેરબજાર બંધ
આવતીકાલે શુક્રવારને તા. ૧૦-૯-૨૦૧૦ના રોજ ઈદ-ઊલ-ફીત્રને અનુલક્ષીને શેરબજાર સત્તાવાર બંધ રહેશે. આજે ૩૦૫૦ શેરોમાં કામકાજ થયા હતા. જે પૈકી ૧૫૭૧ શેરોમાં સુધારો અને ૧૩૬૫ શેરોમાં ઘટાડો નોંધાયો હતો.