(પીટીઆઇ) વોશિંગ્ટન, તા.૮
અમેરિકાના ઓહાયો રાજ્યએ આઉટસોર્સિંગ પર પ્રતિબંધ મૂકી દીધો છે. ઓહાયોના ગવર્નર ટેડ સ્ટ્રીકલેન્ડે આ જાહેરાત કરતા આઉટસોર્સિંગને આર્થિક વિકાસમાં અવરોધરૃપ અને રાજ્યના વેપાર-ઉદ્યોગના વિકાસ માટે અસ્વીકાર્ય ગણાવ્યું હતું. ઓહાયો સ્ટેટના આ નિર્ણયની ખાસ કરીને ભારતીય આઇટી કંપનીઓ પર માઠી અસર પડશે.
ભારતીય આઇટી કંપનીઓને મોટો ફટકો ઃ ગવર્નર સ્ટ્રીકલેન્ડના મતે આઉટસોર્સિંગ વિકાસમાં અવરોધરૃપ અને અસ્વીકાર્ય
અત્યાર સુધી ભારતીય કંપનીઓના આકર્ષવા માટે જાણીતા એવા સ્ટ્રીકલેન્ડે આ જાહેરાત કરતા જણાવ્યું હતું કે નોકરીઓનું આઉટસોર્સિંગ ઓહાયોના મૂલ્યોને અનુરૃપ નથી. ભારતના આઇટી ઉદ્યોગે આ નિર્ણયને ભેદભાવપૂર્ણ ગણાવ્યો હતો. ભારતનો આઇટી ઉદ્યોગની ૬૦ ટકા આવક અમેરિકામાંથી થાય છે.
અમેરિકાના પ્રમુખ બરાક ઓબામા નવેમ્બરમાં ભારતના પ્રવાસે એવી રહ્યા છે ત્યારે એચ-વનબી અને એલ-વન વીઝા ફીમાં વધારા પછીનો આ બીજો આકરો નિર્ણય છે જે ૫૦ અબજ ડૉલરથી વધુના ભારતીય આઇટી કંપનીઓ પર માઠી અસર પહોંચાડશે. આ મુદ્દો ઓબામા સમક્ષ ઉપાડવા માટે ભારતીય આઇટી ઉદ્યોગ સરકાર પર દબાણ વધારશે.
આઇટી ઉદ્યોગના સંગઠને જણાવ્યું હતું કે નાસ્કોના અધિકારીઓના આગામી અમેરિકા પ્રવાસ દરમિયાન આ મુદ્દો ઉપાડવામાં આવશે. નિષ્ણાંતોના મતે ઓહાયોમાં આગામી નવેમ્બરમાં ગવર્નરપદની ચૂંટણીઓ યોજાવાની છે જેને ધ્યાનમાં રાખીને મતદારોને રીઝવવાના આશયથી સ્ટ્રીકલેન્ડે આઉટસોર્સિંગ પર પ્રતિબંધ મૂક્યો છે. સ્ટ્રીકલેન્ડ તેમના સૌથી મોટા હરિફ રિપબ્લિકન પાર્ટીના ઉમેદવાર જ્હોન કેસીચ કરતા લોકપ્રિયતામાં ઘણા પાછળ છે. હાલમાં જ થયેલા જનમત સર્વેક્ષણમાં કેસીચની સરખામણીએ સ્ટ્રીકલેન્ડને ૧૨ ટકા ઓછા મત મળ્યા હતા.
અગાઉ સ્ટ્રીકલેન્ડે ભારતીય કંપનીઓને ઓહાયોમાં આવવા માટેના પ્રયાસો કર્યા હતા. ૨૦૦૭માં અગ્રણી ભારતીય આઇટી કંપની ટીસીએસે ઓહાયોના શહેર મીલફોર્ડમાં પોતાનું કેન્દ્ર સ્થાપવાની જાહેરાત કરી હતી. સ્ટ્રીકલેન્ડે આ કંપનીને ૧.૯ કરોડ ડૉલરની કરરાહતોની ઓફર કરી હતી.
જો કે હવે આગામી ચૂંટણીમાં પરાજયનો સંકેત મળ્યા બાદ સ્ટ્રીકલેન્ડે જણાવ્યું છે કે ભેદભાવપૂર્ણ વેપારી કરારને કારણે ઓહાયોના નાગરિકોને સૌથી માઠી અસર પહોંચી હતી. સ્ટ્રીકલેન્ડે દાવો કર્યો હતો કે તેમના સત્તાકાળ દરમિયાન દરિયાપારની સેવાઓ મેળવવા પર નિયંત્રણો લાદવામાં આવ્યા હતા.