સુરત -
સુરતના ડ્રીમ પ્રોજેક્ટ એવા કેબલ સ્ટેઈડ બ્રિજની ખાત મુર્હુત વિધિ આગામી ગુરૃવારે થશે. આ ખાત મુર્હુત માટે પાલિકા દ્વારા આમત્રણ કાર્ડ છપાવીને આમંત્રણ આપવામાં આવી રહ્યું છે.
પરંતુ શહેર ભાજપ દ્વારા પ્રમુખના અવાજમાં વોઈસ મેસેજ મોકલીને કોર્પોરેટરો તથા કાર્યકરોને આમંત્રણ આપવામાં આવી રહ્યું છે. આમંત્રણ માટે વોઈસ મેસેજના ઉપયોગ બાદ આગામી ચુંટણીમાં ભાજપ હાઈટેક પધ્ધતિથી પ્રચાર કરશે તે અટકળ તેજ થઈ ગઈ છે.
સુરત મહાનગરપાલિકાની ગત સ્થાયી સમિતિની બેઠકમાં કેબલ સ્ટેઈડ બ્રિજની દરખાસ્ત મંજુર કરવામાં આવી હતી. ત્યાર બાદ ચુંટણીની આચાર સંહિતા લાગે તે પહેલાં ગુરૃવારે શહેરી વિકાસ મંત્રી નિતિન પટેલના હસ્તે ખાત મુર્હુત વિધ માટે નક્કી કરાયું છે. આ ખાત મુર્હુત માટે સુરત પાલિકા દ્વારા કેબલ સ્ટેઈડ બ્રિજના ફોટોગ્રાફ સાથે આમંત્રણ કાર્ડ આપવામાં આવ્યા છે.
પરંતુ સુરત શહેર ભાજપ દ્વારા કેબલ સ્ટેઈડ બ્રિજના ખાત મુર્હુતના આમંત્રણ માટે શહેર ભાજપ પ્રમુખ પુર્ણેશ મોદીના અવાજમાં વોઈઝ મેસેજ કોર્પોરેટર અને કાર્યકરોને ફોરવર્ડ કરવામાં આવી રહ્યાં છે. આ જોતાં એવી ચર્ચા શરૃ થઈ ગઈ છે કે, આગામી પાલિકાની ચુંટણીમાં શોર્ટ મેસેજ (એસ.એમ.એસ), વોઈઝ મેસેજ તથા ઈમેલ અને ઈન્ટરનેટ દ્વારા ભાજપનો હાઈટેક ચુંટણી પ્રચાર કરવામાં આવશે.
