મોરબી -
મહારાષ્ટ્રમાંથી નકલી 'સી' ફોર્મ કૌભાંડ પકડાયા બાદ તેની તપાસ રાજકોટના વેટ ડિવિઝન દ્વારા મોરબીનો ૧૨ સીરામીક ઈન્ડસ્ટ્રીઝમાં કરવામાં આવતા રૃા. ૧૮.૬૩ કરોડની ચોરી પકડાયા પછી સીરામીક સહિત અન્ય કોમોડીટીમાં પણ નકલી સી ફોર્મના નામે કરોડો રૃા.ના વ્યવહારો થતા હોવા છાં આ દિશામાં વેટના અધિકારીઓ તપાસ કરવાના બદલે આંખ મિચામણામાં કરતા રહ્યા છે.
મોરબી સિરામીક ઉદ્યોગ દર વર્ષ હજારો નહિ લાખો ટન રો મટીરીયલ્સ આંતરરાજ્ય બજારમાંથી ગુજરાતમાં સિરામીક ઉદ્યોગમાં મગાવવામાં આવે છે. જેમાં ખાસ કરીને સોડાફેલ્ડસસ્પાર, સોડા પોટાસ, ક્વાર્ટસ, બોલ ક્લે, ચાઈના કલે, જેવી અનેક રો મટીરીયલ્સ આંતરરાજ્યમાંથી મગાવવામાં આવે છે. જેની કિંમત લાખો નહિ કરોડો નહિ પણ અબજોમાં આંકી શકાય. આંતરરાજ્ય બજારમાંથી આવા રો મટીરીયલ્સ એટલે કે કાચો માલ મગાવવા સામે જે તે કિંમતના ટેક્ષ સામે સી-ફોર્મ ઈસ્યુ કરવા જરૃરી હોય છે. આ પ્રકારના કૌભાંડમાં આંતરરાજ્ય એજન્ટો પથરાયેલા હોવાની પણ સંભાવના છે.
સીરામીક ઈન્ડસ્ટ્રીઝની માફક અન્ય કોમોડીટી ઉપર પણ જ્યાં ૧૫ ટકાનો વેટ વસુલવામાં આવે છે તેવી ચીજવસ્તુઓમાં પણ આંતરરાજ્ય વેપાર નકલી 'સી' ફોર્મના આધારે થતો રહ્યો હોવાની ફરિયાદ છે. અલબત અત્યારે સીરામીક ઈન્ડસ્ટ્રીઝમાં જ તપાસ કરવાના આદેશ હોવાથી 'વેટ' વિભાગની તપાસ સીરામીકના કારખાનાઓ સુધી સીમિત રહી છે. વેટના અધિકારી સુત્રોના જણાવ્યા અનુસાર જે કારખાનાઓને નકલી 'સી' ફોર્મના કૌભાંડના આધારે વેરો, વ્યાજ અને પેનલ્ટી સહિતની નોટીસ આપવામાં આવી છે. તેના જપ્ત કરવામાં આવેલા ચોપડાનું એસેસમેન્ટ પણ ટુંક સમયમાં શરૃ કરવામાં આવશે. દરમિયાન મોરબી સીરામીક ઈન્ડસ્ટ્રીઝના પ્રમુખ બેચરભાઈ હોથીએ જણાવ્યું છે કે નકલી કે અસલી 'સી' ફોર્મની ઓળખ મેળવવાનું કામ કપરૃ હોય છે. તેથી કારખાનેદારોને દોષિત ગણવાને બદલે વેરા નીતિની વ્યવસ્થામાં સુધારો થવો જરૃરી છે. આમ મોરબીની સીરામીક ઈન્ડસ્ટ્રીઝમાં નકલી 'સી' ફોર્મનો મુદ્દો અત્યારે હોટ ઈસ્યુ બની રહ્યો છે.
|
