વડોદરા -
વડોદરા મ્યુનિસિપલ કોર્પોરેશનના પાણીના ૧૧૫ વર્ષ જૂના સોર્સ ઐતિહાસિક આજવા સરોવરમાં પાણીની સપાટી ભારે વરસાદને પગલે ૨૧૨ ફૂટને ઓળંગી ગઈ હતી. દરમિયાન સિંચાઈ વિભાગના ઈજનેરો બુધવારે આજવાની મુલાકાત લેશે.
સોમવારની સાંજે આજવા સરોવર વિસ્તારમાં માત્ર બે કલાકમાં જ ચાર ઈંચ વરસાદ થતાં સપાટીમાં ઝડપભેર વધારો થયો હતો અને એક જ દિવસમાં આજવા સરોવરમાં સવા ફૂટ પાણી વધ્યું હતું. ગઈ સાંજે ૪ વાગ્યે આજવાની સપાટી ૨૧૦.૯૫ ફૂટ હતી એ પછી આજે સાંજે સપાટી વધીને ૨૧૨.૦૨ ફૂટ થઈ ગઈ હતી. આજવા તરફ પાણી લાવતી ફીડર સાંજે ૬ વાગ્યે પોણા બે ફૂટે ચાલુ હતી. જો કે આજે દિવસ દરમિયાન વરસાદ નજીવો રહ્યો હતો. આજવામાં આજે ૧૨ મિમિ, ધનસરવાવમાં ૧૦ મિમિ તથા હાલોલમાં ૪ મિમિ વરસાદ થયો હતો. આજવા સરોવરથી પાણી લાવવા ત્રીજી લાઈન નાખ્યા બાદ ત્યાંથી ૧૨૫ એમએલડી પાણીનો જથ્થો મેળવવામાં આવે છે.
દરમિયાન આજે બપોરે પાલિકાના સીટી ઈજનેર અને પાણી પુરવઠા ખાતાના કાર્યપાલક ઈજનેરે આજવા સરોવરની મુલાકાત લીધી હતી. આજવા સરોવરના મજબૂતીકરણના કામ બાદ હવે તેમાં વધુમાં વધુ કેટલું પાણી ભરી શકાય તેમ છે તેનો વડોદરા સિંચાઈ વિભાગનો અભિપ્રાય મેળવ્યો છે. સિંચાઈ વિભાગના અધિકારીઓ બુધવારે આજવાની મુલાકાત લેશે અને સ્થળ - સ્થિતિનો અભ્યાસ કરીને આજવામાં કેટલા લેવલ સુધી પાણી ભરવું તેનો અભિપ્રાય આપશે.
