કેર્ડિફ,
કેપ્ટન બટ સહિત ફાસ્ટ બોલર આમીર અને આસિફ જંગી રકમ લઇને નો-બોલ ફિક્સ કરતાં હોવાના ચોંકાવનારા ઘટસ્ફોટ બાદ ખેલાડીઓએ નાણાં લીધા હોવાની કબુલાત કરવા છતાં પાકિસ્તાન બોર્ડ તો તેના ખેલાડીઓને નિર્દોષ જ ગણાવી રહ્યું છે. જો કે પાકિસ્તાનના વન ડે અને ટ્વેન્ટી-૨૦ ટીમના કેપ્ટન આફ્રિદીએ મેચ ફિક્સિંગ કરનારા ખેલાડીઓને તપાસ પુરી ન થાય ત્યાં સુધી સસ્પેન્ડ કરવાના નિર્ણયની તરફેણ કરતાં પાકિસ્તાનના બોર્ડને આંચકો આપ્યો છે. આક્રમક મિજાજ માટે જાણીતા આફ્રિદીએ નિડર કોમેન્ટ કરતાં કહ્યું છે કે, મેચ ફિક્સિંગમાં સંડોવાયેલા ખેલાડીઓને પાકિસ્તાનના ડ્રેસિંગ રૂમથી દૂર જ રાખવા જોઇએ.
બટ, આસિફ અને આમીરને બચાવવાના પ્રયત્નો કરી રહેલા પાકિસ્તાનના બોર્ડને આકરો ફટકો પહોંચાડતાં આફ્રિદીએ કહ્યું હતુ કે, હાલ તો આ ખેલાડીઓ અમારા ડ્રેસિંગ રૂમથી દૂર જ રહે તેમાં જ ટીમનું ભલું છે. બેશરમ પાકિસ્તાન બોર્ડે ખેલાડીઓ સામે પગલાં ન લેતાં આખરે આઇસીસીને કાર્યવાહી કરવી પડી હતી. આફ્રિદીએ મેચ ફિક્સિંગ કૌભાડ અંગે ક્રિકેટ ચાહકોની માફી માંગી હતી અને કહ્યું હતુ કે, પાકિસ્તાનનો ઇંગ્લેન્ડ પ્રવાસ ચાલુ જ રહેશે.
મેચ ફિક્સિંગ વિવાદ બાદ ‘ન્યુઝ ઓફ વર્લ્ડે’ રીલીઝ કરેલા નવા વિડિયોમાં ઓપનર યાસિર હમિદને એમ કહેતો બતાવ્યો છે કે, પાકિસ્તાનના ખેલાડીઓ તો તેઓની લગભગ તમામ મેચો ફિક્સ કરાવવા માંગે છે. આ ઘટસ્ફોટ બાદ પાકિસ્તાનના બોર્ડને વઘુ એક ફટકો પહોંચ્યો હતો. આફ્રિદીએ કહ્યુ હતુ કે, અમે મુશ્કેલ તબક્કામાંથી પસાર થઇ રહ્યા છીએ. અમે આ હાલતમાં પ્રવાસ પડતો મુકી સ્વદેશ પરત ફરી શકીએ નહીં. બધા જાણે છે કે ઇંગ્લેન્ડનો પ્રવાસ પાકિસ્તાનના ક્રિકેટ બોર્ડ માટે કેટલો મહત્વનો છે. હું એમ પણ માનું છુ કે મેચ ફિક્સિંગના આરોપી એવા બટ, આસિફ અને આમીરને ડ્રેસિંગ રૂમથી દુર જ રાખવા જોઇએ, આમ કરવું અમારી ટીમના હિતમાં છે.
પાકિસ્તાનના મેચ ફિક્સર ખેલાડીઓને કથિત બુકી માજીદ પાસેથી નાણાં લીધા હોવાની કબુલાત કરી દીધી હોવાથી પાકિસ્તાન બોર્ડે નવુ કારણ બતાવતાં કહ્યું કે, અમારા ‘નિર્દોષ’ ખેલાડીઓને તો ખબર નહતી કે માજીદ બુકી છે તેમણે તો સ્પોન્સરશીપની રકમ લીધી હતી. જો કે પાકિસ્તાનના આ ત્રણ જ ખેલાડીઓને એવા કયાં સ્પોન્સરે રાતોરાત આટલી મોટી રકમ આપી. વઘુમાં મોટાભાગની સ્પોન્સરશીપ ડીલમાંથી નાણાંની ચુકવણી ચેકથી કે સીધા બેન્કના વ્યવહારોથી થતી હોય છે, જ્યારે ખેલાડીઓ પાસેથી રોકડ રકમ મળતાં તે મેચ ફિક્સિંગ માટેની જ હોવાની શંકા વઘુ મજબુત બની છે.
દરમિયાનમાં આઇસીસીએ મેચ ફિક્સિંગના આરોપી ખેલાડીઓ સામે કુલ ૨૩ આરોપ મુક્યા છે. દરેક ખેલાડી સામે છ પાંના ભરીને આરોપનામું રજુ કરવામાં આવ્યું છે અને તમામ આરોપ આઇસીસીના એન્ટી કરપ્શન કોડના આર્ટિકલ ૨ હેઠળના છે. કેપ્ટન બટ સામે સૌથી લાંબી ચાર્જશીટ રજુ કરવામાં આવી છે. કુલ ૧૮ પાનાનું આરોપનામું આપવામાં આવ્યું હતુ. પાકિસ્તાનની ટેસ્ટ ટીમના કેપ્ટન બટ અને વેટરન ફાસ્ટ બોલર આસિફ પર આજીવન પ્રતિબંધ મુકવામાં આવે તેવી શક્યતા છે. જ્યારે ૧૮ વર્ષના આમીરના મામલે આઇસીસી થોડુ કુણું વલણ અપનાવે તેવી શકયતા છે.
મીડિયામાં વહેતા થયેલા અહેવાલ મુજબ પાકિસ્તાનની ટેસ્ટ ટીમનો કેપ્ટન સલમાન બટ કોઇ પ્રકારના નિયમોને અનુસરતો નહતો અને ટીમ મેનેજમેન્ટના નિયમ બહાર અજાણ્યા વ્યક્તિઓને મળવા જતો રહેતો હતો. આ માટે બટને પાંચ વખત ચેતવણી આપવામાં આવી હતી પણ તે સુધર્યો નહતો. સ્કોટલેન્ડ યાર્ડે હજુ મેચ ફિક્સિંગના મામલે કોઇ જાહેરાત કરી નથી પણ કેટલાક અહેવાલમાં જણાવાયું છે કે, પાકિસ્તાનની ટેસ્ટ ટીમના કેપ્ટનના રૂમમાથી સ્ટિંગ ઓપરેશન કરનારા બ્રિટીશ ટેબ્લોઇડના ૧૦ થી ૧૫ હજારના બીલો મળી આવ્યા છે.