વોશિંગ્ટન,
ન્યૂ ઝીલેન્ડના ક્રાઈસ્ટચર્ચ ખાતે ત્રાટકેલાં ૭.૧ની તીવ્રતાના ભૂકંપના આંચકાએ પૃથ્વીની સપાટી પર નવી ૧૧ ફુટ પાણી ફોલ્ટ લાઈનનો ચીરો પાડ્યો હોવાનું ભૂસ્તર નિષ્ણાંતોએ જણાવ્યું છે. આ શક્તિશાળી આંચકાના લીધે ઈમારતો તૂટી પડી હતી, માર્ગો ચીરાઈ ગયાં હતાં અને રેલવે લાઈનો વળી ગઈ હતી. પૃથ્વીની એક બાજુ જમણી તરફ ખસી હતી અને કેટલાંક સ્થળોએ જમીનો ઉપસી આવી હતી.
કેન્ટરબરી યુનિવર્સિટીના ભૂસ્તરશાસ્ત્રના પ્રોફેસર માર્ક ક્વિગ્લેએ નેશનલ રેડિયો સમક્ષ જણાવ્યું હતું કે સમગ્ર પૃથ્વીમાં નવી ફોલ્ટ લાઈને ૧૧ ફૂટની પહોળાઈની જમીનને વહેરી નાખી હોવાનું અમને જણાય છે. આના પરિણામે કેટલીક સપાટીનો વિસ્તાર ઉપસી આવ્યો છે. પાસિફિક અને ઓસ્ટ્રેલિયન ટેકટોનિક પ્લેટોની સતત અથડાણના કારણે ધરતી કંપનો આંચકો આવ્યો હોવાનું પણ તેમણે જણાવ્યું હતું.
પૃથ્વીની એક તરફનો ભાગ જમણી તરફ ૧૧ ફૂટ જેટલો ખેંચાઈ ગયો છે અને કેટલાંક વિસ્તારો ઉંચે ઉપસી આવ્યા છે. પૃથ્વીની સપાટી પર લાંબી સીધી રેખામાં પહોળી ફાંટ કે તિરાડ પડવાથી મકાનો બે ભાગમાં વિભાજીત થવાં, માર્ગોમાં ધરતીને ચીરતી તિરાડ પડવી જેવી ઘટનાઓ બને છે. ધરતીકંપના લીધે ખેંચાઈને બે ભાગમાં ફંટાયા હોય તેવા બે મકાન અમે જોયાં છે, તેમ પણ પ્રોફેસર કિવગ્લોએ જણાવ્યું હતું.
ન્યૂ ઝીલેન્ડના સાઉથ આઇલેન્ડ નગર નજીક ત્રાટકેલાં ૭.૧ની તીવ્રતાના શક્તિશાળી ધરતીકંપથી ઓછામાં ઓછી ૫૦૦ ઇમારતોનો વિનાશ થયો છે. મોટા ભાગની અન્ય બિલ્ડિંગોને સામાન્ય નુકસાન જ થયું હતું. સમગ્ર વિસ્તારમાં વીજપુરવઠો ખોરવાયો હતો, માર્ગો કાટમાળથી છવાયાં હતાં અને ગેસ-પાણીના પુરવઠા ખોરવાયાં હતાં. જોકે ક્રાઈસ્ટચર્ચના મેયર બોબ પાર્કરના જણાવ્યા મુજબ આ બધી સેવાઓ આજથી પુનઃ ચાલુ કરી દેવાશે. પાણી અને ડ્રેનેજ સવલતો સંપૂર્ણ ચાલુ કરતા થોડો સમય લાગી જશે.
સ્પેશિયાલિસ્ટ ઇજનેરી ટુકડીઓએ તમામ મુખ્ય ઇમારતોના નુકસાનની આકારણી કરવાની શરૂઆત કરી હતી. સત્તાવાળાઓએ જણાવ્યું હતું કે સમગ્ર વિસ્તારની શાળાઓ વઘુ બે દિવસ બંધ રખાશે, જેથી શાળાઓના મકાનો સલામત છે કે કેમ તેની ચકાસણીનો સમય મળી રહે. નિષ્ણાંતોએ જણાવ્યું હતું કે શક્તિશાળી ધરતીકંપ છતાં ઇજાગ્રસ્તોની આટલી ઓછી સંખ્યા દેશના કડક બિલ્ડિંગ બાંધકામ નિયમોને આભારી છે.
