શાંઘાઇ,
તિરંદાજીની ભારતની મેન્સ ટીમે અહીં યોજાયેલી વર્લ્ડ કપ સ્ટેજ ચારના પ્રતિષ્ઠીત સ્પર્ધામાં જાપાનની ટીમને રીકર્વ ઈવેન્ટમાં પરાજય આપીને ગોલ્ડ મેડલ જીત્યો હતો. સિધ્ધી મેળવનાર ભારતના આ ખેલાડીઓમાં જયંતા તાલુકદાર, તરૃણદીપ રાય, અને રાહુલ બેનર્જીનો સમાવેશ થતો હતો. જાપાનની ટીમમાં અમાનો, ફુસકોવા, કીકુચી જેવા આંતરરાષ્ટ્રીય ખ્યાત ખેલાડીઓ હતા.
મુકાબલો ભારે રોમાંચક રહ્યો હતો. ભારતે જાપાનને ૨૨૪-૨૨૦ના સ્કોરથી હરાવ્યું હતું.
પ્રથમ રાઉન્ડના અંતે ભારત ૫૭-૫૪થી અને બીજા રાઉન્ડના અંતે ૧૧૩-૧૦૮થી આગળ હતું. ત્રીજા રાઉન્ડમાં જાપાને ૫૬-૫૫થી આગળ રહ્યું હતું. જ્યારે છેલ્લા રાઉન્ડમાં ૫૬-૫૬થી બંને બરાબરીનો સ્કોર પર હતા. ભારત માટે પ્રથમ એ રાઉન્ડની સરસાઇ મહત્વની પુરવાર થઇ હતી.
વર્લ્ડ કપ સ્ટેજ બેમાં ભારત યજમાન અમેરિકા સામે ક્વાર્ટર ફાઇનલમાં પરાજીત થતા એકપણ મેડલ વગર પરત આવ્યું હતું તે જોતા આ ગોલ્ડમેડલ ઘણો જ મહત્વનો કહી શકાય.
આ વખતે ભારતે પ્રથમ મુકાબલામાં ગોલ્ડ મેડલ જીતવા માટે ફેવરિટ મનાતા ગ્રેટ બ્રિટનને ૨૧૨-૨૧૫થી હરાવી અપસેટ સર્જ્યો હતો. હવે આ કારણે આગામી કોમનવેલ્થ ગેમ્સમાં રોમાંચક હરિફાઇ હોલ્ડ મેડલ જીતવા માટે જામશે.
ભારતે અગાઉના વર્લ્ડકપની હારનો બદલો લેતા યુએસએને ક્વાર્ટર ફાઇનલમાં જ ૨૨૫-૨૦૮થી હરાવીને આગેકૂચ કરી હતી.
બીજી તરફ જાપાને અપસેટ સર્જતી વર્લ્ડ ચેમ્પિયન કોરિયાને ૨૨૪-૨૧૬થી હરાવીને ફાઇનલમાં પ્રવેશ કર્યો હતો. આવા આત્મ વિશ્વાસ અને જાયન્ટ કિલર બનીને ઉતરેલી જાપાનને હરાવીને ભારતે ગોલ મેડલ જીત્યો તેથી તેનું વિશેષ મહત્વ કહી શકાય.